九龍城覓食記 @ 牛石料理

一提起九龍城美食, 好自然會想起泰國菜, 但原來除了泰國菜, 現在開了好多不同種類的食店, 早前便在友人的介紹下去了牛石料理食飯.

來這裡, 當然要試下牛.

我地點了牛石精選盛盒.

一共有八款不同款式, 包括日本佐賀和牛, 澳洲霜降和牛, 澳洲霜降和牛牛舌, 美國頂級牛小排, 美國頂級牛仔骨, 鹿兒島咲雞, 熊本產白豚和熊本產豚腩.

店員並除上三款醬汁.

我地第一時間燒牛.

牛舌偏向厚身一點, 幾有彈性.

牛小排帶有少許咬口.

澳洲霜降和牛肉質幾腍身.

佐賀和牛脂肪分怖較多, 入口較澳洲霜降和牛鬆軟, 但不會感覺好油膩.

這幾款牛對於我來講較為淡口, 相對下, 我自己就鍾意點醬汁一齊食, 更能帶出牛的味道.

另外, 雞肉夠嫩滑, 雞味不錯, 這個有點喜出望外.

對於我來講, 熊本產豚腩較為肥.

我地也點了兩款串燒試下.

雞翼串.

燒得外層夠香脆, 初時見到以為好乾身, 但估不到內裡的雞肉保持嫩滑, 外脆內嫩, 燒得好味道.

雞腎串.

雞腎完全不覺得乾和硬, 入口時仍有少許爽身, 師傳控制時間和火喉技巧相當不錯.

最後, 還送上啫喱, 清新的味道, 感覺舒服.

這裡還有刺身和壽司, 但由於我唔食生嘢, 所以無食.

厚切鹽燒牛舌 @ 肚餓了串燒烤焗專門店

上星期放假係尖沙咀行完街, 便去了Hungry Bird食串燒.

這裡的串燒款式也相當多選擇, 有牛肉類, 海鮮類, 豬肉類, 蔬菜類等… 令人好難決擇.

愛食牛舌的我, 第一時間點了厚切鹽燒牛舌.

上枱時已被厚身的牛舌吸引住.

平日食的燒牛舌, 一般都較為薄身, 但這裡的牛舌就完全不同.

它非常厚身, 好有咬口, 但完全不硬和乾, 而且加了海鹽, 更能帶出牛舌的味道. 愛食牛舌的朋友必定要一試.

由於這個牛舌太好味, 我地再點多咗一次.

西班牙黑毛豬件.

份量都幾大碟. 黑毛豬色澤幾靚, 肥瘦尚算平均.

黑毛豬的肉味較平日食的豬肉為濃, 而且肉質也腍身. 入口也不會覺得太油膩.

海鮮當然不少得.

想一次過試齊不同口味的燒扇貝, 所以點了四式燒扇貝, 包括蒜蓉, 芝士, XO醬和黑松露菌香菇醬.

我選了芝士和蒜蓉味.

扇貝算大隻, 混入芝士有淡淡的芝士香味.

而蒜蓉味則和芝士味完全不同, 加入大量蒜蓉係扇貝面上, 與扇貝一齊食, 口中有濃濃的蒜蓉味. 平日我不多食蒜蓉, 但這裡整的蒜蓉卻好好味.

燒黑椒香茅18cm虎蝦.

虎蝦好大隻, 我自己甚少以黑椒配香茅燒虎蝦.

蝦肉彈牙, 雖然是黑椒, 但不算辣, 而肉中有香茅味, 估不到黑椒和香茅都幾夾.

來到這裡, 要一試佢地的招牌菜破瞉肚餓鳥, 個名好特別, 究竟是咩來呢?

上枱時見到酥皮, 切開後, 見到荷菜, 要再打開它, 就見到內裡是燒乳鴿.

對於愛食濃味的我, 乳鴿味道略淡了一點, 可以點附上的醬汁, 有點似薑醋味道, 而肉質偏向硬了一點.

而愛食酥皮的我, 酥皮幾鬆化, 配合醬汁一齊食就好啱.

食了咁多款肉類, 也要叫蔬菜中和一下.

我地點了蒜蓉燒茄子.

茄子好大條呀, 茄子面仲放滿了蒜蓉, 這裡落蒜蓉真是幾重手, 鍾意食蒜蓉的朋友不好錯過.

茄子的口感是軟棉棉, 軟硬適中. 每食一口茄子, 也充滿蒜蓉味.

BB辣啱晒不食辣的我 @ 陸陸雞煲火鍋

近年流行食雞煲, 早前去了位於旺角白布街的陸陸雞煲火鍋.

普遍雞煲只分小, 中和大辣, 有時小辣對於我來講也偏辣一點, 但這裡卻有BB辣, 絶對適合不食辣的朋友.

雞煲上枱, 先焗一陣, 侍應會前來搞下雞煲, 這時開始聞到香味, 再焗多一陣, 就可以食啦.

雞煲個汁夠杰身, 雖然只有微微的辣, 但卻夠惹味, 啱晒不愛好辣的我, 內裡還有不少配料, 如青椒, 洋蒽, 蒽, 所以好香.

雞肉夠嫩滑, 幾入味, 每件雞切得幾大件, 這件是雞脾, 真是啖啖肉. 這個雞煲是例, 足夠兩個人食.

食完雞, 當然就是打邊鍋. 可以選擇加清湯或辣湯, 我當然加清湯.

食火鍋當然要飲嘢, 這裡新推出了沙冰, 所以一定要試下, 我點了紅豆冰.

紅豆冰好大杯, 而且同我平日飲的整法好不同, 佢是將紅豆打溶, 整成沙冰咁, 好幼滑, 豆味夠, 好足料, 但又不會太甜, 來這裡一定要試, 除了紅豆冰, 仲有香蕉冰和芒果冰.

這裡火鍋的款式也不少, 我地各樣也點了一些.

愛食牛的我, 點了陸陸牛三拼, 當中包括手切肥牛, 美國肥牛, 牛柳粒和金錢展.

每款牛各有不同口感, 手切肥牛較美國肥牛嫩滑, 金錢展較有口感, 而牛柳粒牛味最濃郁, 四款牛中我自己最鍾意牛柳粒.

海鮮也不能少, 點了桂花蚌拼珊瑚蚌和日本廣島蠔.

桂花蚌拼珊瑚蚌夠爽, 而且每件也切得較大份,所以更有口感.

日本廣島蠔也算大隻, 蠔味不俗, 肉質幾滑.

這裡也有一些較特別的款式. 我地點了百花拼咸牛芝士釀油條.

侍應教我地要將油條向上, 百花那款大約滾三十秒左右, 咸牛芝士大約滾二十秒左右便能食. 我就兩款也滾耐多一點時間, 但入口油條仍然有點脆. 幾特別, 可以一試.

另外, 也要一試陸陸手打鮮蝦丸拼墨丸. 最特別之處是有黑墨丸, 真的無乜在其他火鍋店食過.

這三款丸也夠彈牙和鮮味, 我自己最愛黑墨丸, 相對白墨丸, 佢更彈牙和鮮甜, 而且內裡有墨丸粒, 雙重口感.

最後, 還點了自家制炸響鈴.

我自己鍾意滾到好軟身, 等響鈴完全吸收晒鍋裡的精華, 這是最好味.

最後仲有雪糕糯米糍奉送.