外賣燒德國咸豬手 @ Schnee German Restaurant

我自己鍾意食德國豬手, 偶然也會外賣返屋企作為加料. 早前從友人口中得知位於銅鑼灣的Schnee German Restaurant有得外賣豬手, 所以我也第一時間訂了一份燒德國咸豬手.

豬手製作時間大約四十五分鐘, 所以我放工後就來拎.

放工時間, 特別多人, 由銅鑼灣返到屋企都要成個鐘.

佢地是用紙盒載着豬手俾客人外賣, 我問佢有無紙袋, 但佢地話無咁大個袋,雖然佢地話唔會咁易爛, 但拎成個鐘返屋企, 始於有個紙袋好一點.

打開個盒, 豬手是用紙袋載着.

而配材有薯仔, 酸菜就用盒載着.

另外, 有兩款醬料, 客人可以因應自己的喜愛而選擇.

豬手都算幾大隻, 而且切好, 就咁夾來食便可以.

返到來屋企已經成個鐘, 豬手皮當然不是完全脆卜卜, 但入口仍然算脆身.

豬手皮夠薄身, 入口時感覺似食薯片.

豬手肉幾腍身, 肉汁不錯, 不會覺得好硬和乾身.

入口時帶有咸香的肉味, 味道調教不錯, 即使單食也夠味.

我也試了點芥末醬一齊食, 感覺完全不同, 多了一份辣味和芥末香味, 而且更能帶出豬手肉的鮮味, 兩種食法我也鍾意.

薯仔軟硬適中, 而酸菜我本身唔太鍾意食, 所以只是試了少少.

招牌脆皮燒德國咸豬肘伴酸椰菜烤燒薯角 @ Schnee German Restaurant

銅鑼灣多食店, 而且不斷有新的餐廳出現, 較早前便去了Schnee German Restaurant食晚飯.

這是一間主要提供德國菜的餐廳, 也有其他國家的菜式.

首先, 店員先奉上佢地自家製的德國麵包, 附有忌廉芝士.

麵包幾鬆軟, 口感不俗. 再配上忌廉芝士, 佢夠滑身, 雙重口感.

有麵包食, 當然要配番個湯, 我點了海鮮蕃茄清湯.

個湯賣相幾靚.

平日飲的海鮮湯多以濃為主, 清湯較少飲.

味道真係幾淡口, 蕃茄味幾突出.

當中的蝦肉和帶子幾爽口彈牙.

可以清一清喉嚨, 再試其他菜式.

主菜點了招牌脆皮燒德國咸豬肘伴酸椰菜烤燒薯角和傳統西班牙烤乳豬配香脆薯絲.

招牌脆皮燒德國咸豬肘伴酸椰菜烤燒薯角.

愛食豬手的我, 來到食德國菜怎樣可以不點.

上枱時已經香味撲鼻.

份量都幾大隻.

豬手外皮幾香脆, 而內裡的肉夠咸香, 帶有少許的咬口.

食咸手, 伴菜同樣不少得.

這裡的酸椰菜味道適中, 不會太酸.

而我更愛燒薯角, 薯味十足.

傳統西班牙烤乳豬配香脆薯絲.

試咗個豬手, 我地也試埋乳豬.

乳豬外皮夠薄, 基本上沒有脂肪, 口感有點似食薯片, 夠脆口.

內裡的肉質夠嫩滑, 口感和豬手完全不同.

味道調教也不錯.

最後, 就是甜品時間.

我選了日式黑芝麻芝士餅.

賣相幾靚.

芝士餅食得多, 但配以黑芝麻, 我真係無乜食過.

黑芝麻的香味幾濃郁, 入口幾滑身, 又不會太甜.

芝士餅的軟硬度適中, 這個甜品不錯, 大家可以一試.