泰菜之夜 @ 18巷泰國餐廳

較早前相約在銅鑼灣工作的友人食飯, 銅鑼灣食店林立, 今次我地去了位於世貿中心的18巷泰國餐廳食晚飯.

坐下後, 先點個飲品.

在眾多的特式飲品中, 我選了泰式特飲.

究竟當中包含了甚麼, 原來是由新鮮芒果肉, 橙汁, 菠蘿汁, 石榴汁糖水打成的沙冰.

味道好清新和鮮甜, 打出來的沙冰好細滑, 飲的時候唔會覺得太多冰, 無味道.

主菜點了乾咖喱榴槤燴牛展, 泰式燉花膠, 泰式牛尾煲.

泰式燉花膠.

用砂鍋上枱, 所以熱度能夠保持較長時間, 對於我來講, 這是好重要, 因為要夠熱先好飲.

當中材料也豐富, 有我愛食的花膠和冬菇等.

花膠整得夠腍身, 入口帶點膠, 這是我愛食的質感, 而冬菇幾厚身, 較為咬口. 而且味道調教適中.

客人鍾意的話, 可以食的時候加入芽菜, 多一份爽口.

主菜點了泰式牛尾煲.

我鍾意食牛, 所以點了這個牛尾.

泰式整法味道幾濃郁, 啱晒鍾意食濃味的我, 個汁用來配飯食一流.

而且肉質夠嫩滑, 又多汁, 完全不覺得硬和乾身.

最後是甜品時間.

我地點了三色布甸拼盤和貓山皇榴槤糯米飯.

三色布甸拼盤賣相精緻.

三款口味包括牛奶, 芒果和奶茶.

布甸質感好幼滑, 甜度也適中, 當中最特別和有驚喜是奶茶味道. 我也是首次食這個口味的布甸, 估不到咁夾咁好食.

貓山皇榴槤糯米飯.

愛食榴槤的我地, 怎樣也點一款菜式有榴槤.

貓山皇榴槤是我最鍾意食的品種, 榴槤味相當香濃. 而糯米又夠煙煙韌韌, 兩者配搭很不錯.