泰式榴槤炒飯 @ 泰園

較早前與友人去了位於灣仔The Hennessy的泰園食晚飯, 因為友人鍾意食泰國菜.

坐下後, 我先點飲品. 由於天氣還有點凍, 又想滋潤一下喉嚨, 所以點了一杯熱龍眼茶.

熱飲對於我來講最少要夠熱, 這杯啱我要求.

而且龍眼茶甜度也適中, 當中還有我最愛的龍眼肉, 非常滋潤.

沙律點了泰式柚子蝦沙律.

柚子帶點甜甜酸酸, 夠醒胃, 再配上彈牙的蝦肉, 兩者好夾.

這個沙律有點辣, 對於不太食得辣的我還可以接受.

小食點了香葉包雞.

雞肉夠嫩滑, 又多汁, 不會整得過乾. 而且味道也調教適中, 入口時有淡淡的香葉的清香味.

接下來就是主菜出場.

我地點了泰園爆炸辣蟹和泰式榴槤炒飯.

泰園爆炸辣蟹.

食泰國菜, 當然要揀海鮮食下.

上枱時已香味撲鼻.

初時也擔心這個辣蟹會比較辣, 我未必食得到.

但試過後, 無想像中咁辣, 完全接受到.

這個蟹夠乾身, 蟹肉鮮味, 肉質夠結實, 味道夠惹味.

泰式榴槤炒飯.

本身都算鍾意食榴槤, 見到有榴槤炒飯, 覺得幾特別, 因為我未試過, 唔知味道會怎樣.

上枱時未聞到好勁的榴槤味, 但當整開後, 榴槤味漸漸湧出來.

入口時, 有機會食到切成粒粒的榴槤, 就算不太食榴槤的友人也接受到, 因為混入在飯中, 較易接受.

甜品, 我地選了榴槤糯米飯.

剛才的榴槤炒飯必定未能滿足愛食榴槤的朋友, 就一定要試這個.

上枱時已見到整條的榴槤.

糯米入口煙煙韌韌, 而榴槤肉有濃郁的榴槤味道, 軟硬度適中, 這個口感是最好味.