環境和食物質素不俗 - Maison Eric Kayser

上個月難得約到朋友食飯, 決定試一間未食過的餐廳, 最後揀了海港城的Maison Eric Kayser

由於我地沒有訂位, 望海的座位已經一早被訂滿.

我地點了平日優惠晚餐的四人餐, 可以從以下選擇兩個頭盤, 四個主菜和兩個甜品.

隨後, 侍應遞上一籃麵包, 來到要試下這裡的麵包, 每一款都不同, 麵包不算熱辣辣, 也帶點暖身. 很喜歡這裡的牛油, 好滑和軟身.

頭盤我地點了法式洋蔥湯和亞洲特色鮮蝦沙律.

平日係餐廳較少有機會飲法式洋蔥湯, 所以見到就點了. 個湯好香洋蔥, 而且我最愛湯中放了焗芝士法式包, 同個湯好夾.

亞洲特色鮮蝦沙律中的蝦算大隻, 肉質也彈牙, 若多一點鮮味更佳. 而蔬菜幾新鮮.

主菜點了油封鴨腿配黑松露薯蓉, 漢堡牛角配炸薯條, 辣椒蒜香配意大利粉伴番茄醬和香煎鱸魚配檸檬忌廉汁.

一見到油封鴨腿配黑松露薯蓉就想試下. 賣相不俗. 鴨腿已經好稔身, 一切開已經同骨分開. 鴨腿味道適中, 配合薯容一齊食, 口感也不錯呀.

這裡出色是麵包, 當然要試下漢堡牛角配炸薯條. 平時多數整成漢堡包, 漢堡牛角較少角見.

牛角好鬆脆, 而牛肉就較為乾身, 我自己喜歡多一點肉汁.

我自己愛食粗薯條, 較有口感和有薯仔味.

辣椒蒜香配意大利粉伴番茄醬唔算太辣, 反而蕃茄醬更突出, 幾啱鍾意食濃味的我, 入口都幾酸, 幾醒胃.

食了咁多肉類, 就點了香煎鱸魚配檸檬忌廉汁. 魚肉幾滑身, 無腥味. 而且味道幾清.

甜品當然少不了. 我地點了檸檬果撻和朱古力心太軟.

愛食朱古力的我, 必點這個朱古力心太軟. 一上枱要快點食, 因為一切開就流出朱古力醬, 連雪糕一齊食, 一冷一熱, 雙重口感, 而朱古力味也幾濃郁, 但不會過甜.

對於我來講, 檸檬果撻就一般, 不過帶點酸酸地, 幾啱飯後食.

這一餐好豐富, 而且環境不錯, 不論是情侶或是三五知己來傾計也適合.