究極海老味噌拉麵 @ Hamataki

九龍城對於我來講不是一個多去的地區, 一講起九龍城, 自然會想到泰國菜. 原來這裡除了泰國菜外, 也有日本菜的食店, 早前就同友人去了位於九龍城的Hamataki食飯.

店舖不算大, 座位以高枱為主.

我點了究極海老味噌拉麵.

上枱時已見到拉麵在滾着, 有一些細泡仔出現, 與平日的拉麵有所不同.

我先飲一啖湯, 不但夠鮮美, 而且仲好熱辣辣.

一直食落去, 熱度仍然保持着, 原來碗中放了一塊熱石, 這樣能夠令熱度持續長久一點, 對於愛食熱辣辣的湯和麵的我, 絶對合我心意.

拉麵材料有兩隻蝦, 蝦仔, 蛋, 筍, 粟米和紫菜.

蝦肉尚算爽口彈牙.

蛋就帶少許流心, 充滿蛋香, 若再流心一點, 就更加好味.

對於我來講麵質軟硬適中.

另外, 也點了一些小食, 包括秘製炸雞, 大阪燒和日本汁煮餃子.

秘製炸雞.

雞塊都幾大件.

外皮夠脆身, 而雞肉嫩滑, 肉汁不錯, 不會太乾身, 可以說是外脆內嫩.

炸雞是啖啖肉, 完全無骨, 最啱懶人的我.

大阪燒.

上枱時已被佢的份量和燒餅面滿滿的木魚所吸引住.

大阪燒夠鬆身, 再混入醬汁和木魚一齊食, 多重口感.

對於鍾意食木魚的我, 越多木魚, 口感越佳.

日本汁煮餃子.

煎餃子食得多, 汁煮的方法較少食.

餃子皮算薄身, 內裡的饀料肉汁幾多，不會過硬和乾，汁煮方法相對無咁熱氣和油膩，醬汁帶有微微酸酸辣辣，幾醒胃.